Кулун тутар 5 күнүгэр биллэр политическай уонна общественнай деятель З.А. Корнилова күн сириттэн туораата. Христофор Горохов-Элгэстэй киниэхэ анаабыт "Самныбатах саха кыыһа" айымньытыттан быһа тардыылары таһаарабыт.

Зоя Афанасьевна сырдык мөссүөнэ, үтүө дьыалата биир дойдулаахтарыгар өрүү хаалыаҕа.

"Самныбатах саха кыыһа"

(сонеттар дьөрбөлөрө)

I.

Номох буолан сүтүөҥ суоҕа,

Сүрэхтэри абылааҥҥын.

Кырдьык иһин сырдык тыыҥҥын

Тэскилэппит күнүҥ суоҕа.

 

Тэскилэппит күнүҥ суоҕа,

Үрүҥ Дьиэҕэ ытыллартан.

Удьуор көнө сахалартан,

Өбүгэттэн күүһэ-уоҕа.

 

Өбүгэттэн күүһэ-уоҕа,

Айбыт айыы аҕатыттан.

Тыйыс тымныы айылҕаттан,

Бэриллибит эбит кыаҕа.

 

Бэриллибит эбит кыаҕа,

Самныбатах Саха кыыһа.

 

II.

Самныбатах Саха кыыһа,

Саргыҥ өртөн сыдьаайбыта.

Өлүөхүмэ мүөттээх тыата,

Сугун, дьэдьэн, отон аһа.

 

Сугун, дьэдьэн, отон аһа,

Өлүөнэтин ыраас уута.

Ырыа-тойук айар кута,

Оонньуур өҥнөөх, бэл сыа тааһа.

 

Оонньуур өҥнөөх, бэл сыа тааһа,

Оскуолаҕа чуораан тыаһа.

Атас-доҕор аанын аһа

Сыбыытанар күнү быһа.

 

Сыбыытаһар күнү быһа.

Кэлэн ааһар үйэ быыһа.

<…>

IX.

Ааккын өрүү ытыктыаҕа,

Сымнаҕастар сыһыаннара.

Сахаҥ сирин одуннара,

Тумнар арыт туохтан ыарыы?

 

Тумнар арыт туохтан ыарыы?

Ааспыт кэмтэн ыйытыахха

.Өйдөөн-дьүүллээн быһаарыахха,

Тоҕо суоҕай быыһыы барыы?

 

Тоҕо суоҕай быыкыы барыы?

Хааннаах, хабыр хараҥаттан.

Түохпут атын атыттартан?

Ыйытыыбытсылдьар ыарыы.

 

Ыйытыыбыт сылдьар ыарыы,

Кыыллаах Арыы күннээх кыыһа.

X.

Кыыллаах Арыы күннээх кыыһа,

Икки кынат оҕолоро,

Түмүстүлэр хоһоон дьоро,

Хонуутугар киирэн, быһа.

 

Хонуутугар киирэн, быһа,

Олохторун сэһэргээри.

Саха өрүү туттар сиэри,

Бааллар манна сиэннэр, кыыһа.

 

Бааллар манна сиэннэр, кыыһа,

"Айыы-сиэнэ" бүтэрбитэ.

Ыччат түмсэр түһүлгэтэ,

"Дружба" диэн дьикти кыһа.

 

"Дружба" диэн дьикти кыһа

Эн тускугар ыһыах ыһа.

<…>

XV.

Номох буолан сүтүөҥ суоҕа,

Самныбатах Саха кыыҺа.

Кэлэн ааһар үйэ быыһа,

Өрүү "кимий?" ыйытыаҕа.

 

Өрүү "кимий?" ыйытыаҕа,

Номох суолун уһуктаары.

Саастаах, эдэр - ити бары

Ааккын өрүү ыйытыаҕа.

 

Ааккын өрүү ыйытыаҕа,

Кыыллаах Арыы күннээх кыыһа.

Эн тускугар ыһыах ыһа,

Дьолго өрүү тардыһыаҕа.

 

Дьоло өрүү тардыһыаҕа,

Оннук эбээт сырдык баҕа.

"Зоя Корнилова. Обгоняя время..." кинигэттэн. Хаартыската интернет ситимтэн.