Олунньу 14 күнүгэр Киин Абаҕа библиотекатыгар Ийэ тыл уонна сурук-бичик күнүгэр аналлаах республиканскай "Сахалыы диктант" акция буолан ааста. Быйыл Улуу Кыайыы 80 сааһа бэлиэтэнэринэн, Россияҕа Аҕа дойдуну көмүскээччи, Саха сиригэр Ийэ дойдуну көмүскээччи сыллара биллэриллэн диктаҥҥа фронтовик суруйааччы айымньыта талыллыбыт. Ол курдук Тимофей Сметанин "Кыайылаахтар ыһыахтара" кэпсээниттэн быһа тардыыны болҕойон истэн уон кыттыылаах киһи суруйда. Библиотекарь диктаны саҕалыан иннинэ Төрөөбүт тыл күнүн туһунан кэпсээтэ, суруйааччы олоҕун туһунан сырдатта. Тэрээһин үгэс буолбут быһыытынан библиотека үлэһитэ Семенова О.П. сахалыы алаадьынан ытык-мааны ыалдьыттарбытын күндүлээтэ. Итии чэй иһэ олорон өс хоһооннорун салҕыытын этэ оонньоотубут. Бу күрэхтэһиигэ Федоров Александр Юрьевич бэйэтигэр тэҥнээҕи булбата. Баай тыл саппаастаахха бириис туттарылынна, уоннааҕы кыттааччылар эмиэ илии тутуурдаах бардылар. Тэрээһини "Кэскил" кулууп улэҺиттэрин кытта бииргэ бэлэмнээн ыыттыбыт. Кинилэр эйгэни киэргэтэн сахалыы тыыны эптилэр. 

Ол курдук уон кыттыылаахтан биир киһи диктаны биэс сыанаҕа суруйда. "Бастыҥтан бастыҥ суруксут" аатын сүктэ Исаков Олег Гаврильевич. Кини идэтинэн инженер, билигин сынньалаҥҥа олорор көхтөөх пенсионер. "Бастыҥ суруксут" хайҕал суругунан библиотека көхтөөх ааҕааччыта Назарова Саргылана Спиридоновна бэлиэтэннэ. "Үчүгэй суруксут" аатын ылла Кутугутов Александр, диктант саамай эдэр кыттааччыта. Александр Николаевич кулууп уус-уран салайааччыта. Атын кыттыылаахтар эмиэ үчүгэй билиилэрин көрдөрөн түөрт сыанаҕа суруйдулар. Бу сахалыы диктаннары көтүппэт кыттааччыларбыт Малых Раиса Романовна, Ильина Анна Никифоровна, Данилова Вера Ефимовна, Федоров Александр Юрьевич. Диктант суруйааччыларбытыгар барҕа махталбытын тириэрдэбит, аныгыс нэдиэлэҕэ хайҕал суруктаргытын, бириистэргитин уонна туоһу суруктаргытын ыла кэлэргитин күүтэбит!