Олунньу 17 күнүгэр Киин Абаҕа библиотеката уонна "Кэскил" кулууп Саха сиригэр онус төгүлүн ыытыллар "Сахалыы дьыктаан" акцияны тэрийэн ыыттылар. Быйылгы дьыктаан тиэкиһэ –суруйааччы Николай Лугинов айымньыта, 220 тыллаах айылҕа олоҕун туһунан "Чыркымай" диэн кэпсээн. Дьыктааҥҥа уопсайа биэс киһи кыттыыны ылла: Холготтан Назарова С.С., Абаҕаттан Федоров А.Ю., Киин Абаҕаттан Ильина А.Н., Данилова В.Е., Исаков О.Г.

Дьыктаан түмүгүнэн "Бастыҥтан бастыҥ суруксут" аатын сүктэ Федоров Александр Юрьевич, "Бастыҥ суруксут" - Ильина Анна Никифоровна, кинилэр дьыктааны биэс сыанаҕа суруйдулар. Исаков Олег Гаврильевич, Назарова Саргылана Спиридоновна уонна Данилова Вера Ефимовна түөрт сыанаҕа суруйан "Үчүгэй суруксут" диэн ааты ыллылар. Акцияҕа оонньуу буолла, ол курдук өс хоһоон уһугун салҕыы этии, сомоҕо домоҕун уруһуйунан таайы. Ыалдьыттары сахалыы алаадьынан, саламаатынан, итии чэйинэн күндүлээтибит.  
"Сахалыы дьыктааҥҥа" кыттыбыт дьоҥҥо махтанабыт, сыл ахсын кыттар Анна Никифоровнаҕа, Вера Ефимовнаҕа туһаайан махтал тылы этэбит!