БОЯНОВА (АНТОНОВА) АВГУСТА НИКОЛАЕВНА

 

Биһиги тапталлаах ийэбит Августа Николаевна Боянова (Антонова) 1936 сыллаахха от ыйын 21 күнүгэр Кээччи нэһилиэгэр төрөөбүтэ. Ийэтэ Горохова Евдокия Николаевна 1884 сыллаахха төрөөбүт, аҕата Антонов Николай Васильевич 1880 сыллаах төрүөх. Кинилэр 12 оҕону төрөппүттэр. Биһиги ийэбит ыал саамай кыра оҕото – 12-с оҕонон күн сирин көрбүт.

1956 сыллаахха ийэлээх аҕабыт көрсөн, сүрэхтэринэн сөбүлэһэн ыал буолаллар. Эдэр ыал Абаҕа нэһилиэгэр олохсуйаллар. Ийэлээх аҕабыт эдэр саастарыттан колхоз араас үлэтигэр үлэлээн-хамсаан, алта оҕону улаатыннарбыттара. 

Биһиги ийэбит 1970 сыллаахха «Медаль материнства» II-c степеннээх, 1979 сыллаахха «Медаль материнства» I-кы степеннээх мэтээллэринэн наҕараадаламмыта.

Тапталлаах аҕабыт Боянов Николай Афанасьевич колхоз, совхоз биир тарбахха баттанар туруу үлэһитэ этэ. Төрөөбүт нэһилиэгэр өр сылларга эдэр механизатордарга наставниктаабыта. 

Өрөспүүбүлүкэ үрдүнэн кэккэ сылларга хортуоппуйу үүннэриигэ былаанын аһара толорон, үрдүк көрдөрүүнү ситиһэн, таһаарылаах үлэтитэн Саха сирин тыатын хаһаайыстыбатын Үтүөлээх үлэһитэ үрдүк ааты ылбыта. Үлэ Кыһыл знамята орденынан наҕараадаламмыта. Өлүөхүмэ улууһун бочуоттаах олохтооҕо аҕабытынан биһиги – оҕолоро, сиэннэрэ, хос сиэннэрэ киэн туттабыт. 

Биһиги ийэлээх аҕабыт оҕолоро үтүө, дьоһун дьон буола улааталларыгар ис сүрэхтэриттэн баҕараллара, кыһаналлара. 

Улахан кыыстара Пестерева Екатерина Николаевна СГУ филологическай факультетын саха салаатын бүтэрбитэ. Билигин Дьокуускай куорат 26-с №-дээх орто оскуолатыгар учууталлыыр. Үлэ бэтэрээнэ, Саха Өрөспүүбүлүкэтин үөрэҕэриитин туйгуна. Оҕолордоох, сиэннэрдээх. 

Иккис кыыс Харбина Евдокия Николаевна Иркутскайдааҕы тыа хаһаайыстыбатын институтун бүтэрэн, ученай-агроном идэтин ылбыта. Үөрэҕин ситиһиилээхтик бүтэрэн, совхоһугар агрономунан, совхоз комсомолун үлэтин тэрийээччитинэн үлэлээбитэ. Российскай Федерация үлэтин бэтэрээнэ, элбэх махтал суруктарынан, бочуот грамоталарынан наҕараадаламмыта.  Билигин Өлүөхүмэ куоратыгар кырдьаҕастары уонна инбэлииттэри хааччыйар анал дьиэҕэ иитээччинэн үлэлиир. Оҕолордоох, сиэннэрдээх. 

Үһүс кыыс Боянова Наталья Николаевна Абаҕатааҕы сельпоҕа өр сылларга таһаарыылаах атыылааччынан, бухгалтерынан үлэлээбитэ. Кыһамньылаах үлэтин туоһутунан элбэх махтал суруктар, бочуот грамоталара буолаллар. Российскай Федерация үлэтин бэтэрээнэ, Российскай Федерация атыы-эргиэн эйгэтин туйгуна. Оҕолоох, сиэннэрдээх. 

Улахан уол Боянов Владимир Николаевич механик идэлээх. Үөрэҕин бүтэриэҕиттэн төрөөбүт нэһилиэгэр күн бүгүнүгэр үлэлии сылдьар. Нэһилиэгэр отделение механигынан, икки төгүллээн баһылык солбуйааччытынан талыллан үлэлээбитэ. Кэргэнинээн, саха ыалын сиэринэн сүөһү иитэн, сайынын оттоон-мастаан олороллор. Аймахтарыгар, бар дьонугар оһох тутан, техникаларын өрөмүөннээн, тутуу үлэтигэр көмө буолар үтүө хаачыстыбалаах. Билигин Абаҕатааҕы МБДОУ 15-с №-дээх «Кырачаан» уҺуйааҥҥа харабылынан үлэлии сылдьар. Оҕолордоох, сиэннэрдээх.

Кыра уол Боянов Николай Николаевич электрик үөрэхтээх. Тутуу үлэтигэр сыстаҕас буолан дьонугар-сэргэтигэр мэлдьи көмөлөһөр, бар дьонун махталын ылар. Оҕолордоох, сиэннэрдээх. 

Кыра кыыс Моржотова Чемелина Николаевна Абаҕатааҕы МБДОУ 

15-с №-дээх «Кырачаан» уһуйааҥҥа үлэлиир, үс оҕо тапталлаах ийэтэ. Быйыл күһүн өр сыллаах баҕатын олоххо киллэрэн дьиэтээҕи түмэли тэрийдэ. Нэһилиэк салалтата, бииргэ үлэлиир коллектива, уопсастыба, биирдиилээн билэр дьоно күүс-көмө, сүбэ-ама, тирэх буолбуттарыгар ис сүрэхтэн тахсар махталбытын биллэрэбит. Бу үтүө дьыала үүнэр көлүөнэни, кэнчээри ыччаты үтүөҕэ-кэрэҕэ угуйуо, аҕа көлүөнэни убаастыырга, патриотизмҥа иитиэ диэн эрэнэбит. 

Сиэннэр үрдүк үөрэҕи бүтэрэн араас идэни ыллылар, дьон тэҥинэн дьоһуннук үлэлии-хамсыы сылдьаллар. Ол курдук сиэннэр ортолоругар учуутал идэлээхтэр, бухгалтер-экономистар, юристар, гражданскай авиация транспорын эйгэтин маркетина, Өрөспүүбүлүкэ үбүн салаатын үлэһитэ, ИДьМ үлэһитэ, быраабы араҥаччылааччы үлэһиттэр уонна да атын идэлээхтэр бааллар. 

Иккис кыыс Евдокия Николаевна улахан оҕото Харбин Алексей Михайлович Өрөспүүбүлүкэ үбүн тиһигин сайдыытыгар киллэрбит улахан кылаатын иһин, бу дьыл атырдьах ыйыгар Саха Өрөспүүбүлүкэтин үбүн министиэристибэтин бочуоттаах грамотаннан уонна үрүҥ көмүс бэлиэннэн наҕараадаламмыта. 

Ити курдук үлэһит сиэннэр ситиһиилээх үлэлэринэн махтал суруктары, бочуоттаах грамоталары ылалларыттан эбэлэрэ Августа Николаевна, биһиги аймахтар сэмэйдик үөрэбит. 

Идэни ылан үлэлии сылдьар сиэннэртэн балыс сиэннэр, хос сиэннэр билигин үрдүк, орто анал үөрэххэ, оскуолаҕа үөрэнэллэр, кырачааннар уһуйааҥҥа иитиллэллэр. 

Тапталлах ийэбит эдэриттэн быысыбайдыырын сөбүлүүр. Быысыбайдаабыт, киһи хараҕын үөрдэр хартыыналара бааллар, кыра кыыс Чемелина Николаевна харыстаан уура сылдьар. Ийэбит илиитигэр талаанын төрөппүт кыргыттара, сиэн кыргыттара утумнаабыттар. 

Биһиги ийэлээх аҕабыт ыал буолан бииргэ олорбуттара 50 сылыгар «Саха сирин кыһыл көмүс ыаллара»  диэн дьоһун кинигэҕэ киирбиттэрэ. Ол кинигэҕэ ийэбит Августа Николаевна ахтыыта баар: «Абаҕаҕа кэргэн тахсан сүктэн кэлэрбэр ийэм, эдьиийим кыра кыыспыт ыал буолан, киһи-дьон төрдө, элбэх оҕо ийэтэ буолаар диэн алҕаан, ат сиэлигэр кыһыл көмүс биһилэхтэри баайан ыыппыттара», - диэн. 

Ити курдук, эбээбит алгыһа туолан, ийэбит аҕабытын кытта иллээх, дьоллоох ыал аатын сүгэн, алта оҕону төрөтөн, сиэннэрдэнэн, хос сиэннэрдэнэн 61 сыл өйдөһөн, өйөһөн олорбуттара.

Ийэбит барахсан күннэтэ сахалыы сиэринэн саҥа күнү көрсөр. Сиэн, хос сиэн  оҕолорун көрөн дьоллоно үөрэр. Билигин орто кыыһа Наталья Николаевна сылаас сыһыаныгар бигэнэн нус-хас бииргэ олороллор. 

Амарах аҕабыт Николай Афанасьевич олорон ааспыт дьоһун олоҕун оҕолоро, сиэннэрэ, хос сиэннэрэ салгыыллар. 

 

Кыргыттара Моржотова Чемелина Николаевна,

Пестерева Екатерина Николаевна.

  Сэтинньи ый 2022 сыл.